Denunciamos ante a Fiscalía o exceso de metais pesados no Eume
O recente descubrimento de metais pesados nas augas do río Eume e afluentes motivou unha nova denuncia das organizacións ecoloxistas ante a Fiscalía do TSXG. Representantes de Adega e Fusquenlla presentaron ao fiscal as probas do achado na composición das augas: uranio, aluminio, arsénico, manganeso, chumbo e cromo. Todos estas substancias en cantidades moi superiores ás consideradas normais polos organismos internacionais.
As organizacións Adega, Fusquenlla, Sociedade Galega de Historia Natural e Verdegaia xa denunciamos en febreiro pasado ante a Consellaría de Medio Ambiente e ante a Fiscalía do TSXG o enchido pasivo do oco da mina que Endesa estaba a realizar naquel intre. Nunha reunión que se tivo co fiscal encargado dos delitos medioambientais fíxoselle saber as consecuencias negativas que o lago podería acarrear ao río Eume. A alta acidificación do río non parecía motivo suficiente para unha intervención dos organismos oficiais que, ata o día de hoxe, non deron asomos de preocupación.
A gravidade do detectado nesta última análise debería ser razón suficiente para que a fiscalía abrise unha investigación e solicitase a paralización cautelar do enchido da mina de As Pontes pois as augas alí acumuladas poden multiplicar os efectos actuais no que a contaminación se refire. As palabras emitidas esta mesma semana polo fiscal do TSXG, Carlos Varela, nas que lamentaba as escasas denuncias que os cidadáns presentan polos delitos contra o patrimonio, merecen unha reflexión. Ou ben as denuncias non son tan escasas e a xudicatura as ignora, ou os xulgados non gozan de credibilidade entre os cidadáns. Agardemos que nesta ocasión a fiscalía amose unha sensibilidade que a consellaría de medio ambiente parece non ter
Máis información en El País
No Comments
Trackbacks/Pingbacks