Ferrol 8 de xuño: Comunicado de Galiza Non Se Vende

Comunicado de apoio á manifestación o día 8 de xuño en Ferrol

A Rede GNSV expresa o seu apoio á manifestación convocada para o 8 de xuño polo Comité Cidadán de Emerxencia da Ría de Ferrol e outros colectivos, para denunciar unha vez máis a ameaza que constitúe a presencia planta de REGANOSA para a seguridade das miles de persoas que viven na Ría, o incumprimento da lexislación vixente que supón o seu funcionamento, coa imposibilidade engadida de chegar a cumprimentar os condicionados esixibles para a súa legalización.

A degradación da riqueza natural que xera e os prexuízos que isto provoca na economía global da comarca, destruíndo postos de traballo do sector marisqueiro e obstruíndo a posibilidade dunha economía propia e sostible.

Esiximos que se cancele o recente proxecto de voar a canle de entrada á Ría pola destrución irremediable que iso produciría nos seus fondos mariños protexidos na rede Natura, nos bancos marisqueiros e no patrimonio histórico da comarca.

Demandamos tamén que non se autoricen as solicitudes de REGANOSA para aumentar a capacidade de regasificación da planta e se prohiba a circulación de camións cisterna con carga de GNL que incrementarían notoriamente o perigo para a poboación.

RGZNSV denuncia que o proceso de instalación da regasificadora na Ría ten revelado unha realidade política ben pouco saudable e un funcionamento opaco da administración, que en todo momento antepuxo e segue a antepoñer intereses probadamente especulativos ás demandas da cidadanía, por riba incluso do cumprimento das leis.

Apoiamos tamén, unanimemente e sen fisuras, a loita contra ese Plano Acuícola inxusto e destrutor do noso litoral, así como todas as loitas que defenden a riqueza natural, patrimonial e irrenunciable deste país que non está a venda. Desde Teis ó Courel e desde A Garda a Ribadeo.

Moitas son as frontes e moitos os problemas. Mais debemos no futuro coordinar os nosos esforzos na búsqueda dese fin común, moi por riba de calquera outra consideración.

GALIZA NON SE VENDE