Fomento vai construír pasos subterráneos á entrada de Pontedeume, núcleo declarado Conxunto Histórico Artístico

Os veciños de Pontedeume veranse obrigados a acceder ao casco histórico, cada vez máis deteriorado, a través de pasos subterráneos. Fomento, promotor do proxecto, ignora a lexislación para poder levar a cabo as obras

Nun exemplo máis da pouca importancia que a Administración lle concede ao urbanismo, en Pontedeume vanse instalar pasos subterráneos para acceder ao casco histórico. Un conxunto declarado histórico artístico pola Xunta de Galiza non parece ser motivo suficiente para desaconsellar os pasos subterráneos que o Ministerio de Fomento e o propio Concello de Pontedeume van construír coa finalidade de facer máis fluído o tráfico ao seu paso pola vila eumesa. Esta localidade vese atravesada pola estrada nacional 651 e ata hoxe os peóns deben cruzala con axuda de semáforos. Isto ocasiona en determinadas horas do día un tráfico lento que orixina retencións moi mal levadas polos automobilistas. A solución dada pola administración consiste en “enterrar” aos transeuntes e obrigalos a adentrarse na zona monumental a través dos pasos subterráneos.

A idea dun urbanismo respectuoso cos dereitos cidadáns e co patrimonio cultural das nosas vilas exclúe a posibilidade de instarurar solucións anacrónicas que ningún país desenvolvido ousaría acometer. O desinterese dos políticos pola inseguridade, a sucidade, os malos olores e a escuridade que soportarían os eumeses ao transitar por condutos infectos, demostra a pouca ou nula sensibilidade que teñen cos problemas que cada vez máis afectan aos veciños das vilas galegas. Fartos de soportar a urbanización desmesurada dos espazos públicos, agora temos que aturar as cavernas do progreso.

Mais non son estes os únicos argumentos que motivan o rexeitamento destas travesías inmundas. A lei obriga ao promotor do proxecto, Fomento neste caso, a sometelo a un estudo de impacto ambiental e a unha exposición pública por un período de trinta días, unha obriga que o Ministerio non parece disposto a acatar. Ademais tendo en conta o lugar sobre o que se van realizar as obras, no que non se desbota a posibilidade de atopar restos arqueolóxicos, procede ter unha autorización de Patrimonio.

Paradoxalmente son os poderes públicos os que conculcan a lei que eles mesmos promulgan. Difícil convencer á cidaddanía que o Estado vela polos dereitos dos veciños e pola salvagarda do noso patrimonio. Son demasiados casos nos que o que se impón é o libre albedrío á hora de acometer obras nas que só prima o interese político ou, noutros casos, o beneficio das grandes empresas.