Fusquenlla solicita a Patrimonio que paralice as obras das rotondas á entrada do casco histórico de Pontedeume

A asociación advirte de que os operarios cortaron varias pólas ao teixo e retiraron parte das súas raíces, a pesar de que o Ministerio asegurou que non se vería afectado.

p1040051b.jpgFusquenlla solicitou á Dirección Xeral de Patrimonio a paralización “inmediata” das obras de construción da rotonda proxectada polo Ministerio de Fomento fronte á gasolineira do centro urbano de Pontedeume.
O colectivo eumés advirte de que o departamento estatal iniciou os traballos sen a correspondente autorización de Patrimonio e recorda que a vila dos Andrade foi declarada Ben de Interese Cultural e o seu casco histórico, Conxunto Histórico Artístico.
A asociación mantén que as dúas glorietas proxectadas pola carteira de Fomento na estrada que une A Coruña e Ferrol, a N-651, ao seu paso polo centro urbano de Pontedeume, así como os pasos subterráneos, son un “atentado” contra o conxunto arquitectónico da localidade. Rexeita, sobre todo, a entrada ao casco histórico da vila a través dos pasos baixo terra.
poda.jpg En canto ao vello teixo situado nun dos extremos do parque Sarmiento, Fusquenlla advirte de que xa lle cortaron varias pólas e de que os operarios retiraron parte das súas raíces para poder retirar o muro que o rodeaba, unha actuación necesaria debido ás dimensións da rotonda proxectada neste cruzamento, no que conflúen a N-651 e a avenida Ricardo Sánchez, unha das de maior tránsito da localidade. Así llo fixo saber tamén a Patrimonio no escrito no que lle demanda a paralización inmediata dos traballos.
Fomento asegurara ao alcalde, Gabriel Torrente Piñeiro, que o teixo non se vería afectado polas obras e de feito, o primeiro edil manifestou o pasado venres que a árbore non se tocaba.
raices.jpgO Goberno central adxudicou o pasado mes de febreiro a Ocasa (Obras, Camiños e Asfaltos), por 683.000 euros, a construción de dúas rotondas e dous pasos subterráneos no centro urbano eumés. O proxecto titúlase Tratamento de interseccións no punto quilométrico 20,3 da N-651
Momento inadecuado
Desde un primeiro momento, tanto grupos políticos -equipo de goberno e oposición- como veciños mostráronse remisos ao proxecto tal e como o expón o Ministerio de Fomento. Opóñense, sobre todo, ao paso subterráneo e á rotonda proxectada ao final da ponte de pedra, a de maiores dimensións.
Algúns veciños critican tamén o momento escollido para iniciar as obras de construción das glorietas, posto que a localidade, con problemas de tráfico durante todo o ano, recibe a numerosos visitantes durante o verán e aínda está por executar a segunda fase do colexio Couceiro Freijomil, así como as obras de reforma da fachada marítima, co consecuente tráfico de camións. La Opinión

Leave a Comment

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.