Os veciños bloquean a entrada de camións a unha obra no Parque

A Asociación para a Defensa do Parque de Rosalía de Castro instalou unha carpa nunha das entradas ás obras de construción de tres torres de pisos que unha promotora está a executar nesa parte da cidade de Lugo, porque os veciños sosteñen que a empresa carece de licenza para acceder á parcela por ese lugar e o paso de camións, incluso de noite, supón un perigo para os viandantes e os vehículos que circulan pola rúa.

Varios membros dese colectivo veciñal instalaron unha carpa na entrada ás obras por cálea República Arxentina, para impedir o paso de camións e vehículos pesados á parcela. O presidente da asociación, Marcos Bourio, afirmou en declaracións a AGN que non teñen pensado retirarse ata que a empresa demostre que obtivo a correspondente licenza municipal para utilizar ese acceso.

Bourio precisou que este conflito non é novo, porque a mesma asociación bloqueou esa entrada ás obras hai dous meses. Entón, a empresa construtora chamou á policía para que desaloxase aos veciños, pero os funcionarios policiais, precisou, “non puideron facer nada, porque se demostrou que a promotora carecía de licenza para utilizar ese acceso”.

O portavoz dese colectivo explicou que a constante entrada de camións por ese acceso “é un auténtico perigo”, porque traballan “de noite” e non hai ningún “sinal que indique a saída de vehículos pesados, nin operarios que se ocupen de advertir aos viandantes e aos coches que circulan pola rúa desa circunstancia”.

Ao seu xuízo, esta situación é unha mostra máis “da mala planificación destas obras”, ás que o colectivo que representa oponse frontalmente, por considerar que a construción dos bloques de vivendas degradará unha das zonas verdes máis importantes da cidade de Lugo, ao minguar de forma considerable as vistas que hoxe se poden apreciar do río Miño desde o Parque de Rosalía.

“Só nos iremos se nos presentan a correspondente licenza municipal para facer uso dese acceso, porque logo de dous meses tiveron tempo para solicitala”, concluíu Bourio.

El Progreso

Leave a Comment

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.