Presentado o video sobre o Courel producido e realizado por Mabel Rivera e Enrique Banet

Unha peza documental centrada na área natural da Serra do Courel (Lugo) denuncia a situación de “ilegalidade” dunha das minas da zona, a de Campa, situada no municipio de Folgoso, e o “desleixo” por parte da Administración pública por proceder ao peche do depósito ao cumprir unha situación de ilegalidade.

Así, a responsable da produtora do vídeo, Mabel Rivera, explicou que ‘Unha lousa sobre O Courel’ toma como punto de partida a mina de Campa e analiza a situación do depósito. Así, denunciou a “ilegalidade” existente, debido á ausencia dos permisos pertinentes da Administración galega, e tamén as consecuencias naturais que carrexa a apertura de minas nun ámbito natural e a situación na que os empregados exercen o seu labor profesional.

Pola súa parte, o presidente e vicepresidente da asociación ecoloxista SOS Courel, Ramón Ríos e Orlando Álvarez, respectivamente, sinalaron que no vídeo a vai reflectida a situación “contraditoria” que se crea cando a Administración pública “non pecha” os depósitos de extracción de lousa, permitindo a contaminación do lugar, e a decisión por parte da Xunta de incluír a Serra do Courel na Rede Natura.

 

Os responsables de SOS Courel ven incompatible a aposta por parte da Xunta de crear un plan de desenvolvemento para esta zona e o feito de ter un total de 54 minas –sumando as que funcionan e as que están proxectadas– na Serra do Courel. “Os políticos chulean aos courelanos”, aseverou o vicepresidente da organización.

 

SITUACIÓN LABORAL

 

Pola súa banda, o director do documental, Henrique Banet, indicou que no traballo audiovisual se poñen de manifesto os intereses dun “empresario” que busca “enriquecerse” a custa dos cidadáns. Por iso, recriminou que a explotación dos recursos mineiros se estaba a levar a cabo en termos de liberalismo “puro e duro” de modo que o “diñeiro está concentrado” en mans de poucos”.

 

Outra das críticas formuladas no documental, segundo a produtora Mabel Rivera, é o reflexo de como a empresa xestora da mina, Cupa Group, opta por “premer” e “ameazar” os seus empregados así como por realizar contratos de tal maneira que os traballadores coticen noutras condicións ás habituais e “non poidan xubilarse coa idade estipulada”. A produtora executiva engadiu que a empresa prohibe aos seus empregados manter contacto e falar entre eles sobre a súa situación laboral.

 

RESPONSABILIDADES POLÍTICAS.

 

Por outro lado, todos os asistentes culparon á Xunta de Galicia de ser a causante da situación de “descoido” que sofre a serra debido ás verteduras contaminantes procedentes da mina e todos eles coincidiron en denunciar a actitude “desaparecida” dos entes políticos cando a asociación ecoloxista pediu explicacións.

 

Por iso, recriminaron ao Goberno galego o seu “desleixo” de responsabilidade e xustificaron os seus argumentos aludindo á situación de “silencio” que se xerou cando a produtora se puxo en contacto coa Administración pública galega para contrastar versións.

 

CRÍTICAS.

 

En concreto, Rivera riscou de “sangrante” a actuación da Consellería de Medio Ambiente mentres que o vicepresidente da asociación ecoloxista recriminou ao director xeral de Conservación da Natureza, Xosé Benito Reza, a falta de resposta ante as “numerosas” chamadas que a asociación realizou.

 

Ademais, o máximo responsable de SOS Courel recalcou que a Administración autonómica non é allea á situación de descoido que caracteriza á serra e explicou que, malia as multas impostas á empresa, non se procedeu ao seu peche xa que continúa verquendo produtos nocivos ao río Lor, que desemboca no Umia. As razóns esgrimidas pola Xunta céntranse nos “60 postos de traballo que ofrece a mina”.

 

Por outro lado, os participantes criticaron a actitude mantida polos sindicatos en relación ás condicións laborais dos empregados e ironizaron con que “o último logro das asociacións sindicais foi a consecución dun caixeiro para que os empregados puidesen gardar as súas pertenzas personalas”. Por iso, argumentaron que os sindicatos se caracterizan pola “súa inexistencia”.

 

DOCUMENTAL.

 

O proxecto audiovisual establece unha comparación entre a situación do Courel e a do espazo natural asturiano de Somiedo e recolle os testemuños daqueles que accederon a participar como habitantes de lugar, empregados da mina e o alcalde de Folgoso.

 

Segundo explicaron os relatores, o obxectivo do documental é dar a coñecer esta situación, crear un debate na cidadanía e facer unha clara defensa do patrimonio cultural e ambiental da comunidade autónoma galega.

 

MANIFESTACIÓN.

 

Na súa intervención, os relatores fixeron un chamamento á cidadanía galega achéguese á Alameda de Santiago de Compostela ás 12.00 horas para participar o próximo 17 de febreiro nunha manifestación convocada para reivindicar que os espazos naturais de Galicia “non se venden”.

Na convocatoria participan máis de 60 asociacións ecoloxistas e ten como obxectivo reclamar que se paralicen os “desfeitos” naturais como os de Reganosa ou os de que están a afectar actualmente á Serra do Courel.

 

 

Leave a Comment

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.