Visita de apoio de Pérez Esquivel aos opositores ao porto deportivo de Cangas

O arxentino Adolfo Pérez Esquivel, Premio Nobel da Paz (1980), acudiu onte xunto á antiga conserveira de Massó Irmáns en Cangas para expresar o seu apoio ao Foro Social que se opón á construción dun porto deportivo e unha urbanización no Salgueirón, o solar que foi da conserveira. A empresa construtora, Pontes e Calzadas, renovou esta semana a execución do proxecto con protección da Garda Civil, que o luns detivo a un dos portavoces do Foro Social.
Pérez Esquivel, cuxo pai era de Combarro, fixo un breve e intenso discurso ante unha trintena de persoas. “Estamos nun pequeno planeta, a nosa única casa”, dixo para argumentar a defensa do medio ambiente mundial. “Aquí non hai fronteiras para apoiar as causas xustas”, engadiu. Anunciou a posible creación dun tribunal penal internacional para xulgar os delitos ambientais e requiriu o respecto aos dereitos dos pobos “porque moitas veces priviléxiase ao capital financeiro sobre a vida do pobo”. Nese contexto, Pérez Esquivel defendeu os intereses dos mariñeiros e da propia ría de Vigo.

Coincidindo coa súa visita, a construtora Pontes e Calzadas renovou o proxecto de Residencial Mariña Atlántica para O Salgueirón con outra fase de obras que durará 18 meses. Nesta etapa recuperarase o bordo litoral, afirmándoo para construír nel un paseo marítimo, segundo consta no proxecto de Mariña Atlántica. Esta fase enlaza coa anterior de rehabilitación do dique de Punta Tirotea que, segundo a empresa, puido culminarse a pesar da oposición veciñal. As obras que agora acomete, “con todos os permisos pertinentes da Autoridade Portuaria de Vigo e o informe favorable da declaración de impacto ambiental”, esténdense ao longo duns 1.300 metros do bordo litoral, sen avanzar mar dentro na propia construción do porto deportivo.

Mariña Atlántica iniciou as obras do seu proxecto en 2005, sen que apenas poidan adiantarse a pesar da “poquísima xente” que se opón ás mesmas, segundo insisten en destacar fontes da promotora e da construtora. A confraría de pescadores, pola previsible destrución dun banco marisqueiro, e o Foro Social, polas circunstancias especulativas que concorren no proxecto, presentan os principais focos de oposición ao mesmo. O actual goberno de Cangas tamén negou o seu desenvolvemento no pacto de coalición (BNG, PSOE e ACE), pero agora só ACE, liderada por Mariano Abalo, mantén unha aberta beligerancia co proxecto.

As obras volven estar protexidas pola Garda Civil, que o luns detivo a un dos portavoces do Foro Social. Abalo emprazou á alcaldesa, Clara Millán, a paralizar as obras por carecer de permiso municipal e a pechar ao tráfico o viario que usan os camións con material de obra pola ameaza que supón as súas vibracións sobre o edificio da antiga conserveira, catalogada como referente do maior interese do patrimonio industrial de Galicia. El País

4 Comments

  1. Paréceme moi ben toda a protesta contra o proxecto en Masso. Pero baixo o meu punto de vista, nestes mesmos días estase cometendo un dos maiores atentados ecolóxicos en Galiza, e non vexo que GNSV diga nada. Refírome ao encoro de Iberdrola na Ribeira Sacra. Cal é a postura de GNSV perante esta grande desfeita?? O silencio, esperar a que o BNG estea no goberno da Ribeira Sacra e despois denunciar a grande desfeita??

  2. E qué teríamos que facer, calarnos unhas cousas para dicir outras?
    Denuncia o problema de Iberdrola, a RGNSV é unha rede e estou seguro que os seus colectivos non terían problema en suscribir a túa denuncia.
    E se pensas que a rede ten especial animadversión cara ao BNG estás errado/a, aínda que estou seguro que a todas nos doe que xente que estivo defendendo a terra estea agora, como a alcaldesa do BNG en Cangas, do lado dos intereses máis noxentos.

  3. E ti que fixeches loureiro? Gustaríame saber cal é o teu punto de vista sobre o atentado sobre a ribeira sacra.

    Tamén me gustaría saber como de tonto pode ser un para pedir nun blogue ecoloxistas explicacións de se os ecoloxistas están a favor ou en contra de determinada actuación aberrante contra o medio ambiente. Ou de tonto ou de irónico. ¿Pero váleche para ter a conciencia tranquila co partido ao que votas non? Non perdas o tempo en disquisicións partidistas porque o único que mira a realidade dese xeito es ti e os partidos.

    PD:

  4. Si, o outro día entrei no blog do BNG e non vin pronunciamento ningún contra o aforcamento de Sadam Hussein. Será que están a favor da pena de morte.

Trackbacks/Pingbacks

  1. Galiza Non Se Vende » Blog Archive » Detidos numerosos activistas de GNSV nas inmediacións das obras de Massó - [...] escasos días o Premio Nobel da Paz Adolfo Pérez Esquivel apoiaba en Cangas a loita dos nosos compañeiros  e…

Deixa una resposta a Un Cancelar a resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.